തൊട്ടാവാടിയെ തൊടാൻ വരട്ടെ... ഓൺലൈനിൽ കിട്ടും പെട്രോളിനേക്കാൾ വില

പറമ്പുകളിൽനിന്ന് വെട്ടിയൊഴിവാക്കുന്ന ശല്യക്കാരനാണ് തൊട്ടാവാടി. എന്നാൽ ഓൺലൈൻ വിപണിയിൽ അല്പം കേമനാണ് തൊട്ടാവാടി. ഷോപ്ക്ലൂസ് ഡോട് കോം എന്ന സൈറ്റിൽ ഒരു തൊട്ടാവാടിച്ചെടിക്ക് 161 രൂപയാണ് വില. അമ്പതു വിത്തിന് ഫ്ലിപ്കാർട്ടിൽ 106 രൂപയും ആമസോണിൽ 179 രൂപയും.

ചട്ടിയിലും ഗ്രോബാഗിലുമൊക്കെയായി ലഭിക്കുന്ന ചെടിക്ക് ഇനം, വലുപ്പം എന്നിവയുടെ വ്യത്യാസമനുസരിച്ച് നാനൂറിനു മുകളിലേക്കുവരെ വിലയുണ്ട്. ചെടിക്കുമാത്രം ചുരുങ്ങിയത് 110 രൂപ വരും. യൂറോപ്യൻ രാജ്യങ്ങളിൽ പലയിടത്തും അകത്തള ഉദ്യാനങ്ങളിൽ തൊട്ടാവാടിയും വളർത്തുന്നുണ്ട്. ഇതാണ് ഓൺലൈൻ വിപണിക്ക് തൊട്ടാവാടി വിലപ്പെട്ടതാകാൻകാരണം.

നമ്മുടെ രാജ്യത്ത് നാട്ടുവൈദ്യന്മാരും ആയുർവേദവൈദ്യന്മാരും തൊട്ടാവാടി ഔഷധാവശ്യങ്ങൾക്ക് ഉപയോഗിക്കുന്നുണ്ടെങ്കിലും നാട്ടിൽ ധാരാളമായി ലഭിക്കുന്നതുകൊണ്ട് വിലയില്ല. നാട്ടിൻപുറങ്ങളിൽനിന്ന് വേരടക്കമുള്ള തൊട്ടാവാടിച്ചെടി കിലോയ്ക്ക് അമ്പതു രൂപയ്ക്കാണ് എടുക്കുന്നതെന്ന് മരുന്നുശാലകളിലേക്ക് പച്ചമരുന്നുകളെത്തിക്കുന്ന ഏജന്റ് കോട്ടയ്ക്കലെ അണ്ണൻകാട്ടിൽ മുഹമ്മദാലി പറഞ്ഞു. ഇത് പറിച്ചെടുക്കുന്നതിനുള്ള പ്രതിഫലമായേ കണക്കാക്കാനാകൂ. സ്ഥലമുടമകളിൽ ഭൂരിഭാഗവും തൊട്ടാവാടിക്ക് വിലയീടാക്കാറില്ല.

ഔഷധഗുണങ്ങളേറെ

നാട്ടുവൈദ്യത്തിൽ 'പ്രാണൻതരുന്ന' ഔഷധമാണ് തൊട്ടാവാടി. ശ്വാസംമുട്ടുള്ളവർ തൊട്ടാവാടിയുടെ ഇലയരച്ചുപിഴിഞ്ഞ് നീര് കുടിക്കാറുണ്ട്. തൊട്ടാവാടി അരച്ചിട്ടാൽ മുറിവുണങ്ങും. കണ്ണിലെ വീക്കത്തിനും തൊട്ടാവാടി നീര് നല്ലതാണ്. കുട്ടികളിലെ ശ്വാസംമുട്ട് മാറാൻ തൊട്ടാവാടിയുടെ നീരും കരിക്കിൻവെള്ളവും ചേർത്ത് ദിവസം ഒരുനേരം വീതം രണ്ടു ദിവസം കൊടുത്താൽ മതി. വിഷജന്തുക്കൾ കടിച്ചുണ്ടാകുന്ന രക്തസ്രാവം കുറയ്ക്കാനുള്ള ശേഷിയുമുണ്ട്. തൊട്ടാവാടിനീര് തൊലിപ്പുറത്തെ അലർജിയും ശമിപ്പിക്കും.

പ്രമേഹൗഷധമെന്ന നിലയിലും തൊട്ടാവാടിക്ക് പ്രാധാന്യമുണ്ട്. പ്രമേഹത്തിനുള്ള കടകകതിരാദികഷായം, രക്തസ്തംഭനത്തിനും വേദനയ്ക്കുമുള്ള ലാക്ഷാദിചൂർണം, വേദന, നീർക്കെട്ട്, ജലദോഷം, അണുബാധ തുടങ്ങിയവയ്ക്കുള്ള അരിമേദാദിതൈലം, വലിയ അരിമേദസ്തൈലം തുടങ്ങിയ മരുന്നുകൾ തൊട്ടാവാടി ചേർത്ത് ഉണ്ടാക്കുന്നവയാണ്.