ചാറ്റുകള്‍ മാത്രമല്ല, ഇനി മെസേജും പിൻ ചെയ്യാം! പുതിയ അപ്ഡേറ്റുമായി വാട്സ്‌ആപ്പ് എത്തുന്നു

ഉപഭോക്താക്കളുടെ കാത്തിരിപ്പുകള്‍ക്കൊടുവില്‍ പുതിയ ഫീച്ചറുമായി വാട്സ്‌ആപ്പ് എത്തുന്നു. ചാറ്റുകള്‍ക്ക് പുറമേ, ഇത്തവണ മെസേജുകള്‍ പിൻ ചെയ്ത് വയ്ക്കാനുള്ള ഫീച്ചറിനാണ് വാട്സ്‌ആപ്പ് രൂപം നല്‍കുന്നത്.

ഇതോടെ, ഉപഭോക്താക്കളുടെ ഇഷ്ടാനുസരണം പ്രധാനപ്പെട്ട മെസേജുകള്‍ പിൻ ചെയ്യാൻ കഴിയും. ഇഷ്ടമുള്ള മെസേജില്‍ പ്രസ് ചെയ്ത് പിടിച്ചാല്‍, മുകളിലായി പിൻ ചെയ്യാനുള്ള ഐക്കണ്‍ തെളിയുന്നതാണ്.

വാട്സ്‌ആപ്പിന്റെ 2.23.21.4 ബീറ്റ പതിപ്പില്‍ ഈ ഫീച്ചര്‍ ലഭ്യമാക്കിയിട്ടുണ്ട്. പിൻ ചെയ്ത് വയ്ക്കുന്ന മെസേജുകള്‍, അതത് ചാറ്റുകളുടെ മുകള്‍ ഭാഗത്തായാണ് കാണാൻ കഴിയുക. നിലവില്‍, ഈ ഫീച്ചറുമായി ബന്ധപ്പെട്ട കൂടുതല്‍ വിവരങ്ങള്‍ വാട്സ്‌ആപ്പ് പുറത്തുവിട്ടിട്ടില്ല. സാധാരണയായി വാട്സ്‌ആപ്പില്‍ പരമാവധി 3 ചാറ്റുകള്‍ വരെയാണ് പിൻ ചെയ്ത് വയ്ക്കാൻ സാധിക്കാറുള്ളത്. എന്നാല്‍, എത്ര മെസേജുകള്‍ പിൻ ചെയ്ത് വയ്ക്കാം എന്നതിനെക്കുറിച്ച്‌ കൂടുതല്‍ സൂചനകള്‍ ലഭ്യമല്ല.