കൈറ്റ് വിക്ടേഴ്‌സില്‍ ഒമ്പതുവരെ ക്ലാസുകള്‍ 22ന് പൂര്‍ത്തിയാകും..

കൈറ്റ് വിക്ടേഴ്‌സ് വഴിയുള്ള ഫസ്റ്റ്‌ബെല്‍ 2.0 ഡിജിറ്റല്‍ ക്ലാസുകളില്‍ പത്ത്, പന്ത്രണ്ട് ക്ലാസുകളുടെ റിവിഷന്‍, തത്സമയ സംശയനിവാരണം ഉള്‍പ്പെടെയുള്ള സംപ്രേഷണം പൂര്‍ത്തിയായി. ഒന്നു മുതല്‍ ഒമ്പതുവരെയുള്ള ക്ലാസുകള്‍ക്ക് 23 മുതല്‍ പരീക്ഷ തുടങ്ങുന്നതിനാല്‍ 22നു മുമ്പ് സംപ്രേഷണം അവസാനിപ്പിക്കും. പ്ലസ്‌വണിന് ഇനി 23 മുതല്‍ മാത്രമേ കൈറ്റ് വിക്ടേഴ്‌സില്‍ ക്ലാസുകള്‍ ഉണ്ടാകൂ. പുതിയ സമയക്രമത്തിലും കൈറ്റ് വിക്ടേഴ്‌സില്‍ ആദ്യസംപ്രേഷണവും കൈറ്റ് വിക്ടേഴ്‌സ് പ്ലസില്‍ അടുത്ത ദിവസം പുനഃസംപ്രേഷണവും ആയിരിക്കും. എട്ടാംക്ലാസിന് ഇനിമുതല്‍ രാവിലെ 7.30 മുതല്‍ നാലുക്ലാസുകളും (പുനഃസംപ്രേഷണം അടുത്ത ദിവസം ഉച്ചയ്ക്ക് രണ്ടിന്) ഒമ്പതാംക്ലാസിന് രാവിലെ 9.30 മുതല്‍ രണ്ടുക്ലാസുകളും (പുനഃസംപ്രേഷണം ഉച്ചക്ക് ഒന്നിന്) ആയിരിക്കും. ഏഴാംക്ലാസിന് രാവിലെ 10.30 മുതലും (പുനഃസംപ്രേഷണം വൈകുന്നേരം നാലിന്) അഞ്ചിന് 11.30 മുതലും (പുനഃസംപ്രേഷണം വൈകുന്നേരം അഞ്ചിന്) ക്ലാസുകള്‍ സംപ്രേഷണം ചെയ്യും.

ഒന്ന്, രണ്ട്, മൂന്ന്, നാല് ക്ലാസുകള്‍ക്ക് യഥാക്രമം 4.30, 3.30, 2.00, 12.30 സമയങ്ങളിലാണ് ക്ലാസുകള്‍. രണ്ടാം ക്ലാസിന് രണ്ടും മറ്റു ക്ലാസുകള്‍ക്ക് മൂന്നും ക്ലാസുകള്‍ ദിവസേന സംപ്രേഷണം ചെയ്യും. പുനഃസംപ്രേഷണം അടുത്ത ദിവസം കൈറ്റ് വിക്ടേഴ്‌സ് പ്ലസില്‍ (ഒന്ന് മുതല്‍ നാല് വരെ) യഥാക്രമം 11.30, 10.30, 9.00, 7.30 എന്നീ സമയങ്ങളിലാണ്.

ഈ അധ്യയനവര്‍ഷത്തെ മുഴുവന്‍ ക്ലാസുകളും ഈയാഴ്ച ഫസ്റ്റ്‌ബെല്‍ പോര്‍ട്ടലില്‍ (firstbell.kite.kerala.gov.in) ലഭ്യമാക്കുമെന്ന് കൈറ്റ് സി.ഇ.ഒ. കെ. അന്‍വര്‍ സാദത്ത് അറിയിച്ചു. ബുധന്‍ മുതല്‍ വെള്ളിവരെ വൈകുന്നേരം ആറിന് ലിറ്റില്‍ കൈറ്റ്‌സ് അഭിരുചിപരീക്ഷയ്ക്ക് സഹായിക്കുന്ന ക്ലാസുകള്‍ സംപ്രേഷണം ചെയ്യും.